أنا من عنيزة وفاخر بأهلها
أهل الوفا وأهل الفعول الجليله
حصن الرجال اللي قليل زللها
حل حلاليل بحيل وحيله
أنا من عنيزة وبلبس حللها
وبرفع التاج المرصع وأشيله
دار لنا حره ولا احد دهلها
باول زمانه وآخره مستحيله
في دولة التوحيد يبرك جملها
والراية الخضراء عليها ظليله
أنا من عنيزة وبضرب مثلها
بالإنتماء والاحتماء والفضيله
بالفكر والتفكير ابرفع جهلها
من منبر التعليم بأفضل وسيله
التنمية فيها نحرك عجلها
بالإقتصاد الحر وزنه وكيله
نضع من أنصاف الفرص مكتملها
نمد له بالطيب يمنا جزيله
دار لنا تزها وتبها وتلها
بين الديار توشحت بالجميله
دار الشيوخ اللي تبارك عملها
للعلم والتعليم كل يجي له
نبي المزون الغرّ تروي سهلها
من النفود لجا لها تستخيله
تبرق وترعد ثم ترسل ثعلها
لما طريق السيل ينحر مسيله
نبي الطيور اللي تهاجر تجي لها
تشهل وتنهل من فياض محيله
مركز حضارة نجد تمشي مهلها
مثل القطيع اللي درج من مقيله
نبي نشارك نهضة في دولها
لو كان راس المال يخلى سبيله
كل عيونه في بلاده كحلها
وانا عيوني من دواها عليله
ذروة سنام المجد للي وصلها
ما هيب للي اجهد الوقت حيله
همة مواطن في جهود بذلها
مثل ابو خالد يوم حاش الطويله
شيد صروح العلم ثم شملها
برعايته في خطوة له نبيله
سجل له التاريخ بيض فعلها
ادلى بدلوه لبن صار الدليله
مع لجنة التجميل عشنا باملها
سرنا وسارت في ركاب مهيله
ما دري من اللي بالمثاني عقلها
وامست خبر ما بين ليلة وليله
ما حد نقض حبله عقب ما فتلها
الا تكود سياسته وتعديله
هذي عنيزة والله اللي جعلها
بقلوبنا حية ولا له مثيله
اجدادنا رخصت دماهم لجلها
قامواعليها بالسيوف الصقيله
وحنا إلى حل اللزوم نخذلها
ما كن للديرة حقوق أصيله
ترا دروب العز ما احدن جهلها
الدرب واضح لا ندور بديله
شخصية الديره من اللي انتحلها
يقضب مناخرها لما تستوي له
الكل مسئول ولا احد سألها
اجيالنا تسأل ولو طال طيله
كل المدن قامت ولا احد حملها
الا عياله لو حموله ثقيلة
لين السهل يشرف بقمة جبلها
مثل النجوم وكلنا نهتدي له
صرنا نصوغ اعذارها في جملها
لين السبق روًح وخلي شعيله
ورا سديد الراي نفسه عزلها
قام يتواري عن عيون القبيلة
خلي المجال الجاهل يرتجلها
والا غريب يستعد لرحيله
وين الشجيع اللي يبي ينتشلها
من قبل لا تظهر علينا الفشيلة
شارك وبارك لا تبين خللها
بالدعم والتأييد واشعل فتيله
نرا حقوق الدار ماله ولا الها
الا رجاله والذليلة ذليلة
يا سيدة الدن اعذري عن جدلها
واستبشري بالخير مع كل شيله
يا سيدة المدن اشهلي من عسلها
ترا الزمان ادوار لو زاد ميله
ام حنون ما تبين زعلها
باخضانها تبرد كيود غليله
اقولها فوق الطويله واحلها
لاهل العقول الصاحية واستميله
واناجي الجيل الجديد بجللها
جيل تجلى ثم جلجل بحيله
هبو ولبو دعوة اللي دعى لها
ترا الهذيلة لو مدحتو هزيله
